PANGARADEON NA PARJOLO

Pangaradeon ni Ruas:

• Saluhut Ruas marpahean adat hombar tu pahean ni suhuna
• Sabiji anggir jantan
• Gotilon naung nitontuhon ni Paroki dengganan ma nian diangka namangula hauma mangalehon eme, jala tu angka ruas na so marhauma boi do marrumanghon sihumisik, jala di pamasuk ma i tu amplop, disurathon ma goar ni keluarga. Dipamasuk ma i tu tandok na marisi harbue pir, marlapikhon demban saur.
• Molo adong sian Ruas na taronjar  rohana mamboan silua tu Debata marumanghon angka lampet, angka hasil ni haumana, denggan ma i diboan tingki na pasahathon pelean tu langgatan.
• Mamboan angka boni, rupani i: boni ni eme, lasiak manang lan angka na asing.
• Naporlu siingothon dison, unang dibahen ingananna di tas palstik, lehetan ma dibahen di pinggan manang di tandok
• Sipanganon ni angka keluarga laho panganon dung sun pelean Misa
• Naporlu siingotonta ganup: Ama-ina dohot anggota keluarga mansai uli dohot ingkon rap hundul sakeluarga paboa las ni rohanta manghamauliatehon denggan basa ni Debata, dohot mangido naringkot di ngolu ni keluarga.

 

Pangaradeon ni Pengurus

• Pajagarhon langgatan ni Debata (Altar Utama)
• Paulihon sagi natolu. Sagi Na Tolu, dipajagar dohot lambe, mange-mange ni pining marlapishon abit na bontar dipeakhon ma i tu langgatan na adong di garejanta.
• Mamboan sawan putih (Ukuranna na umbalga), jala sada anggir jantan dibagasan. Jala diparade ma sada piso laho maneat anggir, jala paneatna pe seat saur matua
• Paradehon itak na hinopingan, itak gurgur, sagusagu si dua solup (ukuran 6 tangkar), ansimun siataon, gaol (si-leu) jala sude angka ondeng ingkon marlapikhon demban saur tanda somba ni rohanta tu Debata
• Paradehon ingkau na hombar laho sipanganon dung sun ulaon Misa
• Tandok ni Ruas dipaulak dung sun ulaon Misa Nabadia, dung jolo disurathon tu Buku Kewajiban na tinontuhon ni Paroki.

 

RUHUT-RUHUT NI PESTA SIPAHA LIMA (PESTA GOTILON)

PAMUNGKAAN

Siingothon:

Sude Ruas dohot angka na martugas magarade di luar (hombar tu natinontuhon ni namanguluhon), Silang uduran dihopit tolu lilin na galak, siamun siambirang dohot di pudi ni siboan Silang uduran. Malim/Partogi, aek na naeng tangianghonon na dibagasan sawan dohot angka itak na tolu bagian i, gaol dohot ansimun, mangihut muse ma dohot angka keluarga namamboan gotilonna dohot angka bonina. (angka na martugas ondeng marpahean adat saguru tu suhuna). Denggan ma nian Pangula i papulikhon inganan ni boni dohot gotilon naung tinontuhon (siamun ni langgatan angka boni, siambirang angka gotilonna be)

 

Lagu Perarakan manang Gondang Pambuhai:

BETK 591/Gondang Lae-lae (molo adong gondang)

• Sude Ruas marbaris tu jolo mardongan ende manang gondang dohot marlas ni roha
• Dung sahat Malim/Partogi, dijolo ni langgatan gondang/ende, Malim/Partogi manjalo saluhut angka pelean (itak, sagu-sagu, sawan, gaol dohot ansimun. Dipeakhon ma i diinganan naung tinontuhon). Saluhut na on  didongani/diiringi ende.
• Dung sidung sude uduran diuduti Mandalathon  (mangalehon) tandok panungkunan jala andung puji-pujian sian Malim/Partogi

 

Malim:    Di hamu saluhutna ruas ni Hurianta na hinaholongan, Gongkon sipaimaon, joujou sialusan. Di gongkon dohot joujoumuna, nunga ro hami dison martampak hasadaon. Ba dia ma baliga puli, tu gota ni simargalagala; dia ma angka hata na uli jala dia pandokanna; pala marpungu hita sadarion marjagar jala marlas ni roha. Gabe sibegeon ni sipareon, sipeopon di bagasan roha, paboa damang ma dia nangkatna dia nangkokna. Dia hatana, dia nidokna;

Protokol:Mauliate ma disungkunsungkun ni Malimnami. Ia panggoari na umbagas di parpunguanta i ma Pesta Olopolop Mauliate, Pesta Gotilon Sipahalima. Di pangarajumion ni na porsea, sian Debata Sitolu Sada do haroroan ni nasa na adong, Ibana Sitompa langit dohot tano Morsa. Ompu Raja Mulamula, Ompu Raja Mulana; Na ro sian sisomarmula, ndang binoto nang ujungna. Ibana do manompa sude na di Ibana; hasiangan dohot tano, nang saluhutna hita jolma. Ibana do ngoluna, Ibana do hasana; Ibana pasupasuna, Ibana do dumana. Manggotil hami, Pastor, di Sipahalima Pariama; Mariaia hita jolma sae soada mara. Manggora di rohanta mauliate tu Debata; Tu parhalado ni Huria pasaorhon basabasa. Naung tajangkon saonari sai ditambai Tuhanta; Di taon na naeng ro lam dipasisir dipaganda.

Malim:    Hata na uli, barita las ni roha, sai dijangkon tondi somba marhuhuasi. Taboan angka i tu tangiang ni Huria, asa saut martua di pamatang dohot tondinta.

Malim:    Dibagasan Goar ni Ama dohot Anak dohot Tondi Parbadia. Hagogoon ni Tuhanta Yesus Kristus, holong ni roha ni Debata, dohot parsaoran ni Tondi Parbadia ma mandongani hamu saluhutna

Ruas:       Nang hamu pe didongani Tuhan i

 

Andung Puji-pujian I (Pslm 65:1-5)

Reff:   Puji ma Tuhan, Puji ma Tuhan i

            Puji ma Tuhan, silehon ngolu i

Malim:     Ingkon nalom ni roha di Ho do pujipujian,

ale Debata di Sion, jala gararon do tu Ho bagabaga.

Ale sitangihon tangiang! Tu Ho do ro nasa sibuk.

Gumogo do angka alualu ni hajahaton asa ahu,

sai Ho ma manesa angka pangalaosionnami.

Martua ma halak na pinillitmi,

jala niloas-Mi dumonok, manginganhon angka alaman nami

Sai pasabam ma rohanami binahen ni hinadenggan ni bagasmu, joroM na badia i.

Ruas: Mangulangi Reff

Ruas: Amen

Tangiang Pujian I (Tu Debata Ama dohot Kristus)

Protokol: O…Amang Panggual Pargonsi partarias namalo, situmbur ni bulu, situmbur ni hope na hundul ditatuan hot dibonggar ni ruma, dinamamona-monahon pesta gotilon on, asa bahen Damang majolo dihami gondang sipitu buhu. Ai Kristus do Malim bolon jala Malim ihutan asa tapasahat ma jumolo gondang on tu Kristus Rajanta i, asa diparbadiai hita luhutna. Asa songon nidok ni namatua sijolo-jolo tubu sianjur mula-mula, tu sianjur mula tompa, parsirangan ni aek pardomuan ni hosa. Somba ni na maduma somba ni na tinompa. Ai Debata do na mamungka asa martua hita jolma. Ai Jesus gabe jolma sahat alu-alunta sian ganup natinompa.

Dapothon Damang ma gondang mula-mula i.

Andung Puji-pujian II

Sian Buku ni Psalmen (Pslm 65:6-10)

Malim

Tung na songkal do pangalusim tu hami di bagasan hatigoran,

ale Debata ni hatuaonnami,

haposan ni saluhut ujung ni tano on dohot laut, angka na dao i.

Ho do sipaojak angka dolok marhitehite gogom, marhohos hagogoon.

Ho do sipaso hasak di angka laut, hasak ni angka galumbangna i

dohot ogaoga ni angka bangso.

Jadi mabiar ma angka partopi laut

maradophon tanda angka na binahenMi,

marolopolop ma dibahen Ho

angka parmulaan ni habinsaran dohot hasundutan.

 Ditingkir Ho do tano on, jadi sirnip ma, jala gabe situtu.

Gok aek do mual ni Debata, manjadi do eme nasida dibahen Ho,

ai songon on do parpauli

Ruas: Amen

Ende / Gondang Paduahon (Gondang Debata Sitolu Sada)

Protokol: Mauliate ma amang pandenami, nunga dibahen ho gondang mula-mula. Mula ni na adong, mula ninatinompa. Mangihut ma muse gondang somba, asa si Raja Inda-inda si Raja Inda Pati, na pajujung pinggan toho di las ni ari. Pasahat-sahat somba tu Ompunta Mulajadi. Asa saut jolma I martua di pamatang dohot Tondi. ni Debata Sitolu Sada sada suhu hasangapon, di Ibana nasa somba, somba ujung hamuliaon. Yesus si tobus hajolmaon, sahat ma sahala raja ngolu namarhatuaon. Dapothon ma amang gondang Debata Sitolu Sada i.

 

Andung Puji-Pujian III

Sian Buku ni Psalmen ( Pslm 28:1-3;6)

Malim

Tu Ho do ahu jou-jou ale Jahowa partanobatoanhu,

unang sip Ho, manundali ahu, asa unang ahu molo tung laos sip Ho manundali ahu, dos hon halak angka namanuruk tanoman.

Sai tangihon ma soara ni somba-sombanghu,

molo mangangguhi ahu tu Ho.

Molo hu paherbang tanganhu tu bilut ni habadiaongMu.

Unang tung sarat ahu rap dohot angka parjahat

dohot angka siulahon angka hajahatan, angka parhata lesem tudonganna, hape hajahaton do dibagasan rohana.

Pinuji maHo Jahowa ai nunga ditangihon ho somba-sombanghi.

R   : Amen

Ende / Gondang Patoluhon (Gondang Ni Halak Na Badia)

Protokol: Mauliate ma amang pande nami, nunga dibahen ho gondang somba I, nuaeng pa asa mangelek ma hita tu Debata marhite halak nabadia, suang songoni I tu angka tondi ni ompunta  dohot angka namborunta namanggompar halak batak, asa dilehon asi, marngolu nabadia, bonar jala daulat saleleng mangolu hita ditanoon. Asa palti bulung sihala, lomak bulung hariara, sai manumpak ma Debata manghorasi tangiang ni nabadia, bahen damang ma gondang nihalak nabadia i.

 

Andung Puji-Pujian IV

Sian Buku ni Psalmen ( Pslm 20:2-5)

Malim

Sai dialusi Jahowa ma ho di ari hagogotan,

sai dipatimbul goar ni Debata ni Jakob ma Ho.

Ditongoshon ma tu Ho panumpahion, sian bagas habadiaon,

Jala ditungkol Ho sian Sion.

Sai marningot ma Ibana di sude angka peleanmu sipanganon,sai talmis ma dirohana peleanmu situtungon.

Sai dilehon ma tu Ho sisubut rohaM, jala dipasaut nasa sangkapMi.

R   : Amen

Ende / Gondang Paopathon (Gondang Simonang-monang)

Protokol: Nunga dipasat ho amang gandang somba, gondang hormat tu     pangisi ni banua ginjang. Sonari mamungka muse ma gondang ni parbanua tonga. Ai sian panompaon,dohot sian pamasu-masuon ni parbanua ginjang gabe sorang ma banua tonga-on, dohot jolma manisia pangisina. Tanda ni torop maribur jolma i jala marsitulus dalan na, bahen damang ma di hami godang simonang-monang. Naeng mangaliat ma hami songon parliat ni jolma i tu dolok tu toruan. Asa tinarik andor-andor mardekdekhan ma markisa. Horas ma angka pardalan-dalan, hipas angka na tinggal di huta. Sinur ma nang angka na pinahan, tu gabe na angka na taula. Simbur magodang ma angka danak-danak, songon ombuson pura-pura. Saur ma hita on matua, limut-limuton tanggurung ta, dapothon ma amang gondang liat i.

 

 

Andung Puji-Pujian V

Sian Buku ni Psalmen ( Pslm 7:2-5)

Malim

Tangihon ma on sude hamu angka bangso.

Tarehon ma pinggolmu sude hamu pangisi ni hasianganon.

Nang hamu situan natorop, nang raja rodi namora dohot napogos.

Hatahononni pamanganHu ma habisuhon,

 jala hapistaran do pingkiran ni rohangKu.

paelengonHu ma pinggol tu umpama,

papataronHu ma huling-hulinganKu mardogan parhinaloan.

R   : Amen

Ende / Gondang Palimahon Gondang Siboru Malim/Sabe-Sabe)

Protokol: Mauliate ma amang pande nami mansai las roha nunga ditariashon damang puji-pujian las ni roha nami tu Debata. Saonari pe mangelek ma nami tu Debata na songkal i unang haribo-riboan, sitokka hali pur-puran diangka na mangulahon patik dohot lomo ni roha ni Debata.alani i, asa margogo hami  mangulahon tohonan I, mangido pasu-pasu ma hami sian Debata marhite naposona, asa marbunga-bunga pansur, di julu-julu nitapian. Tu dia di langkahon sai tong dapotan hatuaon. Asa saria satolop tudolok tutoruan sonang di tarontok, hot dame di ampuan. Kininjuah banta karina. Mejuah-juah kita kerina. Horas hita haganupan. horas-horas hata toba na. Asa dapothon damang ma gondang siuk-siuk tu gandang sabe-sabe

(Malim ro manabe-nabe ruas)

 

Manangianghon aek:

Malim:  Ale Debata, Ama ni Jesus Kristus, mula ni nasa na adong. Ho do ale Tuhan, mula ni Banua Ginjang, Bona ni Banua Tonga, Mula ni Somba Hyang, Bona ni na marhosa. Marhite aek diaturhon Ho, mula ni na marlundu, Mula ni na marlata, Na untopap pusupusu, mula ni onggak marsoara; Sai sumurut tarmalu nasa huaso ni parjahat, Asa songgop pasupasu di hami jolma manisia. Somba dohot mauliate diaturhon hami siminikMu, Na ingot di poda, hami bangso pinillitMu, Tona so marlaok bota, sai ampe ma pasupasu  Asa saut martua, ampu di tonga ni jabu. Dison ale Tuhan hutiop hami sawan puti Puti so haliapan, puti so halipurpuran. Dohot aek na ias, siuras badan dohot tondi, Sai manatap manoggor ma Ho ale Tuhan sian langit. Di langitan, sian ginjang ni ginjangan, Sian habangsa banua ginjang sian surgo habadiaon Sai martinangi, marbinege di parsahataan ni tangiang. Mangelek bangsoMon sai soggop parsaulian. Urasi ma aek nabadia on sian harumunon ni sibolis, Sahapi asa pita jala polin, Parbadia ma on ale Tuhan marhite gogo ni asiM. Dingini marhite badia ni TondiM.Bahen ma i sipaias pardagingon, Pabadiahon partondion, Asa tiur dalan boluson, tio aek dapotan. Di mual hangoluan holongMu na manontong.,Songgop pasupasuan sumurut nasa holso, Dosanami na marpangkurangi di pangalaho  Nahujolo- hupudi, marpangalobii di harohaon, Na sintak na matebur songon parabit ni na so malo, Mual on ma ale Tuhan gabe gundur pangalamuni, Ansimun pangalombohi, Sipangalek pandamori di holongMu na gok asi. Asi tiur ma songon ari, Rintar songon bonang di gala,  Jongjong hami di joloMi, ias so ada mara. Dibagasan goarMu na sunbadia, Ama dohot Anak, dohot Tondi Porbadia, Hutandai hami ma mual on marhite silang ni AnakMu (+). Asa tio songon baba ni mula, Puti sohaliapan, puti sohalipurpuan, Hot dibagasan patikMu so hariboriboan, dapotan pasu-pasu ni tondiM, Dibagasan AnakMu Jesus Kristus, Tuhan jala Debatanami, na mangolu. Jala mangarajai raphon Ho dibagasan hasadaon ni Tondi Porbadia, nuaeng dohot. Tongtong sahat ro di saleleng ni lelengna.

U: Amen

 

Manangianghon Itak Sagu-sagu, Itak gabur, Itak Nanihopingan, gaol Assimun, demban saur.

(Imam/Partogi patoltol tangan tua angka silua ondeng)

Malim:  Ale Ompung Debata Mula Jadi Na Bolon, ditompa Ho do portibion dohot nasa isina, lumobi ma jolma manisia, patimbul harajaon-Mu diatas tanoh on. Asa manatap manonggor ma Ho sian langit ni langitan, sian ginjang ni ginjangan, mamasu-masu silua nami on. Nunga rade hubahen hami dison sagu-sagu sidua sasolup. Malambok pusu ma rohaM mida hami dohot silua nami on, patumona ni na niula nami, asa sagu ma hajolmaon dibagasan hahipason,  jala holpu  ma pansamotan, horas tondi madingin jojak tondi matogu.

Dison diparade hami itak gur-gur, olo ma tano ulaon nami, anggiat mulak tu sanggar ma amporik, bali turuangna ma satua, horas hami pardalan-dalan, mangomo hami nang martiga-tiga, sinur angka pinahan, gabe-gabe angka na niula. Asa bilur-bilurma bonang-bonang, sangkabiur gabe satapongan gogo ni hauma nami dibalian.

Dison do itak nanihopingan, songon ima di sura roha ni ruas-Mon rap manimbung dompak toru mangangkat rap tu ginjang, marsada roha mamuji pasangapon Ho.

Mangihut do muse hubaen hami gaol pangalumi pangalamboki, asa mangalombok pusu ma rohaM ale Debata di hami ruasni huria-Mon. Songon i muse ansimun siataon, asa sahata satolop saria, luhutna hami pararaton baritaM nauli i. Gabe sulu di naholom tungkot di na landit.

Nang angka demban tiar-demban saur asa saur hami matua diatas tano on dalan nami martonggo, dalan nami mangido asi-asi sian Ho lumobi ma di namameleon dirinami tu Ho. On ma elek-elek puji-pujian nami tu Ho, dibagasan goarni anak-Mu Tuhan nami Yesus Kristus, na mangolu raphon-Ho, dibagasan hasadaon Tondi Porbadia nuaeng dohot tong-tong sahat ro di saleleng-ni leleng na

R  :        Amen

 

Tangiang Hamauliateon Siala Gotilon Ni Angka Ruas.

(Malim/Partogi managianghon angka gotilon dohot boni laos patoltol tangan).

Malim:  Ale Debata Amanami pargogo na so hatudosan, natama jala na patut hudok hami mauliate tu Ho, siala nunga ditangihon Ho angka tangiang nami. Ala pasu-pasuM disude ulaon nami, ala sude pangurupuionMu di hami tingki hasusaan.

Nunga diurupi Ho hami huhut dilehon Ho tu hami hagogoon laho mangulahon angka ulaon nami mardongan dohot hadameon. Ala nunga dipatihi Ho hami, ingkon mangula jala mangarajai tano on.

Mauliatema Tuhan ala nunga didokhon Ho hami manguloahon sude angka tugas nami laho maniru ngoluM. Alani mataniari naung tinompam na manondang i hami jala paluahon hami sian sude angka hasusaan. Mauliatema ale Tuhan alani hosa na pinangkem laho manarihon sude angka na mangolu. Alani udan dohot ombun na mambahen na ni tano on.

Ale Debata Ama nami pargogo na so hatudosan jala na manontong, tontongdo dilehon Ho tu hami sipanganon nami siganup ari sian hagabeon ni tano on. Mardongan roha na gok hamauliateon, hupangido hami ma tu Ho pasu-pasuma hami raphon angka hasil ni naniula ni tangan nami naung hujalo hami sian habasaonMu. Sai tontongma hami marhahipason marhitehite i, asa margogo hamimanguduti angka ulaon nami, huhut psangaphon jala mamuji goarMu. Jagama sude hasil naniulani tangan nami. Puji-pujian dohot hamauliateon on, hupasahat hamima tu Ho marhite Kristus Tuhan nami.

U. Amin

 

Dungi diuduti dohot ende (Malim/Partogi bongot tu langgatan)

 

PAMUNGKAAN

 

 

Tanda Silang

P:           Dibagasan Goar ni Ama dohot Anak dohot Tondi Porbadia

R:           Amen

Hata Huhuasi:

P:           Hagoon ni Tuhan Jesus Kristus, Holong ni roha ni Debata,   dohot parsaoran ni Tondi Porbadia ma mandongani hamu saluhutna.

R:           Nang hamu pe didongani Tuhan i.

Hata Patujolo

Panolsolion

Tangiang Hamubaon

P:           O Debata parasiroha.........

R:           husolsoli do dosangku. Alani uhumMu na tama mangonai tu ahu Alai lumobi ala hupaleaHo. Sibahen na denggan na umbalga di ahu Jala na sumurung hinadengganMu. Au mangkagigihon dosanghu. Dohot marbagabaga. Mardongan pangurupi ni asiM padengganhon parangehu. Jala so mardosa be. O Tuhan asirohaM di ahu pardosa on. (laos mangurasi Ruas dohot aek nabadia)

(Molo adong Gondang)

(Gondang panolsolion, gondang Parsiarabu/ganti ni Ale Tuhan)

Protokol: Ipe Amang Batara guru humundul, asa marasi ni roha Debata nasunhinagogo i di hita    songon pandok ni umpasa mandok, asa gala-gala sitelluk ma telluk mardagul-dagul, di angka pambahenan na bengkuk sai Debata ma namangapul-apul. Bahen damang ma gondang siarabu i.

(Dungi di udutima Mangurasi Ruas dohot aek nabadia)

Absolusi:

P:           Sai marasi ni rohama Debata Nasunhinagogo i di hita, sai disesa Ibana ma angka dosanta, jala ditogutogu ma hita tu hangoluan na tontong.

R:           Amen

Hamuliaon

Tangiang Pamungkaan (songon hatiha di ari Minggu i, laos ditambai, Intensi hamauliaton ni gotilon)

 

PARHALADOON NI HATA NI DEBATA

Gondang Parhaladoon

(Petugas Siboan Evangeliarum dohot parpsalmen mamboan Buku Nabadia huhut ditortorhon tu jolo ni langgatan laos mangalehon Pustaha Nabadia tu Malim laos petugas mambongoti mimbar Sabda)

Protokol: O…… Amang Panggual Pargonci Batara Guru Humundul, partarias namalo, na hundul ditatuan, nahot dibonggar ni ruma, pasahat-sahat somba dohot alu-aluan tu Ompunta na martua Debata. Naeng boanon ma Pustaha Nabadia tu jolo ni langgatan bahen damang ma gondang parhaladoon

1. Panjahaon I sian  Minggu nasomal hatiha i

2. Psalmen Hatopan sian  Minggu nasomal hatiha i

3. Bacaan II sian  Minggu nasomal hatiha i

4. Ayat Manomu-nomu Barita Nauli

5. Panjahaon Barita Nauli

6. Jamita

7. Haporseaon na Sampulu dua i

8. Tangiang Pangidoan

M:         Hamu sude angka dongan nahinaholongan dibagasan goar ni Tuhanta Yesus Kristus, rap ma hita pasahathon angka pangidoanta  Debata.....

Sb T:     Ale Debata pargogo na so hatudosan na patut jala tama dohami mandok mauliate tu adopanMu, ala pasu-pasuM na suksuk i naung hujalo hami disude angka ulaon nami, lumobi ma dipangurupionMu dihami ditingki hasusaan.

martangiang ma hita.........................

Sb T:     Nunga diurupi Ho hami huhut dilehon Ho tu hami hagogoon laho mangulahon angka ulaon nami mardongan burju ni roha ala hasil ni ulaon nami, hahipason, hadameon dohot hasonangan. Marhite i ma di patihi Ho hami naingkon mangula jala mangarajai tanoon..

martangiang ma hita.........................

Sb T:     Ala nunga didokhon Ho hami mangulahon sude angka ulaon nami, laho maniru ngoluM. Ala mataniari naung tinompaM namanondangi hami jala pangoluhon sude angka suan-suanan.

martangiang ma hita.........................

Sb T:     Ala ni hosa napinangkeM laho manarihon sude angka namangolu alani udan dohot ombun na mambahen napu tanoon.

martangiang ma hita.........................

(Ditambai dohot tangiang minggu nasomal hatiha i)

 

LITURGI EKARISTI

Ende Silua na Parjolo (Papunguhon silua)

Dung salpu papunguhon silua, diuduti ma Ende Pelean paduahon laho manaruhon Pelean tu langgatan. (Dison ma molo adong angka ruas pasahathon angka pelean na pinatupana)

Gondang Pasahat Pelean (Molo Adong Gondang).

Protokol : O..Amang Panggual Pargonci, Batara Guru Humundul partarias na malo. Nunga dison pelean ni ruas naeng somba honon tu Debata asa tung baen damang majo dihami gondang santi i, asa dipaeleng Debata sipareonna mamasu-masu angka siluaon gabe santi madingin santi matogu nauntotap pusu-pusu sahat alu-alu lumobi pasu-pasu tu sambubu. Dapothon ma Amang gondang santi i.

(Malim/Partogi mangarade dijolo ni langgatan. Jala saluhut angka namamboan pelean dohot silua ingkon songta-songti ala tu Debata do sipelehononta Pelean na taboan.)

Ende

Tangiang Pelean

P:           Martangiang ma hamu ale angka dongan, anggiat dihalomohon Debata peleanta on.

R:           Sai dijalo Tuhan i ma pelenta on sian tanganmuna, huhut bahen hatuaon di hita dohot di sandok huriaNa nabadia.

P:           Ale Debata Ama nami na parholong roha, tontongdo dilehon Ho tu hami mangula di tano na tinompa-Mon. Marlas roha hami pasahathon pelean nami on tu adopanMu. Anggiat marhite pelean nabadia on lam huantusi hami ma mandok mauliate tu Ho. Jala anggiat ma marhite pelean on lam tarpasu-pasuma hami di saluhut angka ulaon nami. Marhite Jesus Kristus Tuhan nami.

R:           Amen

Dialog Prefasi

P           : Tuhan i  mandongani hamu

R.          : Nang hamu pe didongani Tuhan i

P           : Dompak ginjang ma rohanta

R           : Nunga tapahehe rohanta dompak Tuhan i

P           : Mandok mauliate ma hita tu Tuhan Debatanta

R           : Patut jala tama do i.

P:           Ima tutu, na patut jala na tama do i, na sintong jala na uli, asa manontong manang na didiape hami mandok mauliate tu Ho, ale Tuhan, Ama Nabadia, Debata na sunhinagogo jala na manontong.

Ai nangpe so ringkot di Ho pujipujiannami, tong do huetong hami i basabasaM, molo tarbahen hami mandok mauliate tu Ho. Ai ndang na manambai hamuliaonMu umbahen na hupuji hami Ho, alai paro haluaon di hami do. Marhite Kristus Tuhan nami.

Dibahen i, langit dohot tano on, angka surusuruan dohot partogina rampak mamujimuji pasangaphon Ho, ndang na mansadi be hami mangendehon:

 

Nabadia

Tangiang Bolon II  (diganti dohot Tangiang Bolon IX)

P:         Tung nabadia do Ho ale Amang, Mual ni nasa habadiaon. Antong hupangido hami, parbadiai ma siluanami on marhite gogo ni TondiM. Asa muba di hami gabe Daging (+) dohot Mudar ni Tuhannami Jesus Kristus.

            Di borngin uju dipasahat Ibana, paima so songgop sitaonon na bernit na jinaloNa sian rade ni roha, dibuat Ibana ma roti, didok ma mauliate, diponggoli ma roti i diparlehon tu angka siseanna mandok:

JALO HAMU JALA PANGAN HAMU!

AI ON DO DAGINGHU, NA PINASAHAT HUMOPHOP HAMU!

            Songon i muse, dung sidung mangan, dibuat Jesus ma panginuman. Didok muse mauliate, dipasahat ma i tu angka siseanNa, huhut mandok:        

JALO HAMU, SUDE HAMU MINUM SIAN ON!

ON MA PANGINUMAN NA MARISI MUDARHU,

MUDAR PARPADANAN NI PADAN NA IMBARU, JALA NAMANONTONG.

NA NIUSEHON HUMOPHOP HAMU DOHOT NATOROP,

BAHEN HASESAAN NI DOSA.

 SONGON I MA ULAHON HAMU, BAHEN PARNINGOTAN DI AHU.

 

Amamnese

P:          On ma pamusatan ni luhut parsaulian na hinaporesaan i. 

R:           Hamamatem Tuhan, hubaritahon hami. HaheheonMu do huhatindanghon hami. HaroroMu sogot do huhalungunhon hami

P:           Antong, huhut marningot, hamamate dohot haheheon ni Kristus, husombahon hami do tu Ho ale Amang, roti hangoluan dohot panginuman haluaon on. Mandok mauliate do hami ala nunga dipatama Ho hami, jongjong di adopanMu marhalado di joloM. Hupangido hami, asa hami, naung manjalo daging dohot mudar ni Kristus,  dipasada Tondi Porbadia i gabe bangsoM.  Ale Amang, pasupasu ma HuriaM na marserak di liat tano on. Sai bahen ma asa lam tamba holong na masihaholongan di hami, raphon Pausnami Benediktus XVI,  Uskupnami Anicetus Sinaga, dohot sude parhalado ni HuriaMi.

P:           Palua ma angka dongannami, angka na porsea dohot sude tahe angka naung monding i. Sai lehon ma tu nasida dohot tu sude dongan naung mate di bagasan Kristus paradianan na sonang. Sai asi ma rohaM tu nasida, janghon ma nasida tu bagasan ampuanMu.

P:           Ale Amang, sude do hami mangido asi ni rohaM asa dohot hami marjambar di hatuaon na manontong raphon Santa Maria, Nasohabubuhan, Ina ni Debata raphon angka apostel dohot sude nabadia, na tong mangolu di bagasan holongMu. Sai loas ma hami dohot mamuji, pasangaphon Ho.

P:           Marhite-hite Ibana rap dohot Ibana laos di bagasan Ibana, tongtongdo sahat tu Ho ale Debata Ama na sunhinagogo, nasa somba dohot hamuliaon sahat ro di saleleng ni lelengna.

R:           Amen!

Gondang Somba Hyang  

Protokol: Nunga ditonga-tonganta on Yesus Kristus Rajanta na songkal I, nabuni dibagasan rupa roti. Ipe Amang panggual pargonci bahen damang gondang Somba Hyang I asa tasomba-somba Rajanta I gabe tamue ni rohanta. Dapothon ma amang.

Amanami

P:             Marpos ni roha ma hita martangiang tu Amanta Debata, songon naniajarhon ni Anak-Na tu hita, huhut mangendehon.

R:             Amanami……..

Embolisme

P:             Ale Amang, saut ma lomo ni rohaM, ai holan lomo ni roham do ojahan dohot hapeahan ni ngolunami. Anggiat ma ndang mansadi hami mangulahon lomo ni rohaM dibagasan dirinami sandiri, di tonga ni masyarakat dohot na torop huhut maimama di haroro ni Jesus Kristus, Sipalua hami. 

R:             Ai Ho nampuna harajaon dohot hagogoon dohot hasangapon ro di saleleng ni leleng na

Tangiang Dame

P:             Ale Tuhan Jesus Kristus, didok Ho do uju i tu angka apostelMu: “Dame do Hutinggalhon di hamu, damengHu do Hulehon tu hamu.” Sai unang ma jujur angka dosanami, alai bereng ma haporseaon ni HuriaM. Antong pargogoi ma hami asa mangolu di bagasan hasadaon na tutu hombar tu na hinalomohonMu. Ai Ho do parhitenannami nuaeng ro di saleleng ni lelengna.

R:             Amen

P:             Dame ni Tuhan i ma mandongani hamu tongtong

R:             Sai i ma huhut donganmuna.

 

Salam Dame

Anak Biru- biru

Pangaradeon Laho Manjalo Komuni

P:             Ida ma Anak Biru-biru ni Debata na mambuat dosa ni portibi    on. Martua ma hita na niarahon tu haroan ni biru-biru i.

R:             Ale Tuhan ……….

 

Ende di tingki Komuni

 

Penutup

 

 

 

Tangiang Panutup (Sian ari Minggu nasomal hatiha i)

Manangianghon Boni

P:         Ale Debata Amanami Sitompa langit dohot tano, ala ni asi dohot holong ni rohaM, hu ula jala hurajumi hami do ngolu nami siganup ari, marhitehite hapistaron dohot hagogoon naung ni lehonMu tu hami. Hupangido hami ma tu Ho, sai lehonma tu hami ringgas dohot polin ni roha laho mangulahon ulaon nami mardongan roha mauliate. Padao ma sian hami roha insak jala roha namanalahonangka dongan alai holan marhite asi dohot pangurupionMu do tuk hujalo hami sipanganon nami siganup ari. Alani i ma ale Amang Debata Na Sunhinagogo pasu-pasu ma sude nasa ulaon nami marhite hagogoonMu padao ma luhut musu ni angka suan-suanan nami. Pasu-pasu, pangolu ma sude boni on (+). Lehon   ma tu sude jumanami udan ditingkina , padaoma sude angka panegai alani udan na padorashu. Padaoma angka binantang na ra manegai saluhut angka suansuan dohot dorbianami, asa boi hami manggotil ditingkina mardongan las ni roha huhut mardongan hamauliateon siala ni sude angka pasupasu dohot basabasaMi. Marhite Kristus Tuhan nami.

R.: Amen

Dungi diurasima sude angka boni i dohot aek naung pinasupasu.

Dungi Malim mandompakhon Ruas huhut mandok hata sigabe-gabe.

Binanga ni sihombing tu bongkak ni tarabunga

Tu sanggar ma amporik tu lubang ma satua

Sinur ma pinahan gabe na niula.

Ai gabe ma eme i, tio-tio nang parbuena.

Pagodang-godang na memetmet ombuson pura-pura

Mulak poso na matua limit-limuton tanggurungna

Horas nadipardalanan hipas-hipas na tinggal di huta.

 Umbolon ma boltokna, tiar-tiar dohot biurna

Porngis tio-tio dang adong nang lapungna.

 

Manangianghon Anggir ni Ruas

(sude ruas mangangkat anggirna tuginjang  jala dung tangiang on dipispis Mali/Partogi ma)

P: Ale Debata Ama nami, Debata Mula jadi Na Bolon, Hodo na mangurasi hami marhite pasupasuM, dibahen i gabe panguras ma tutu anggir on di hami: na uli asa tamba tu ulina, manguras dina hansit asa malum sian sahitna, manguras di hami pardosa asa malua hami sian dosa, dohot manguras di angka huaso ni si sibolis asa malua hami sian uti-utian ni portibi. Marhite Jesus Kristus Tuhan nami, na mangolu nuaeng dohot tontong rodi saleleng ni lelengna.

R: Amen

Tingting

Silua Paduahon

Pasu-pasu:

P  : Tuhan i  mandongani hamu na.

R. : Nang hamu pe didongani Tuhan i.

P  : Mardame ma hita mulak mardongan pasu-pasu ni Tuhan i , ai nunga sun be ulaonta

R  : Mauliate ma di Debata

P : Debata na sun hinagogo i  ma, na mangurupi, mandongani hamu    disaluhut ulaonmu jala Debatama na mamasu-masu hamuna. Ama   dohot Anak dohot Tondi Porbadia. 

R.:  Amen

 

Gondang hasahatan/sitio-tio.

Prot:       Amang Panggual Pargonci, nunga sun be ulaonta namarhasongtion on, asa sahat ma sahala tua ampe tu pinggan pasu, sahat hita martua ala Debata mamasu-masu. Nunga dison Debatanta, somba ma hita tu Ibana. Asa songon ni dok ni umpasa. Asa ni tahu ma mual tio, nionjatan ma tu panuhatan. Bahen damang ma gondang sitio-tio laos tampehon ma tu hasahatan.

(Imam bersama Misdinar mulak sian Altar mulak tu biluk parhobasan, laos manghorasi Umat mardongan harbue pir dung sahat dijolo ni Umat 3 hali)

Horas!!!!!!!!!!!! Horas !!!!!!!!!!!  Horas!!!!!!!!!

 

 

Na Porlu pabotohonon:

• Dung simpul ulaon habadiaon, diudutima muse marpesta lasni roha.
• Boi angka itak i dibagihon malim tu angka ruas na hinsa rohana mangido.
• Suang songoni aek sian sawan putih dibagi-bagi tu ruas, jala onma na diboan tu bagasna be
• Dung sidung marsipanganon dipaulakma angka tandok ni ruas na martandok mamboan gotilonna, jala disima disurat angka petugas.

Hatorangan  ni angka pandohan:

1.  Anggir         :pangurason asa marhaiason, jala anggir jantan mangartihon parjuangan dinalaho mangalo musu.

2.  Aek              :pabornokhon

3.  Miak-miak   :tanda ni parngoluan na imbaru (dihirim roha do ngolu naimbaru do manontong diatas ni tanoon, miak dihajolmaon dohot miak diangka na ni ula.

4.  Demban Saur : hirim ni roha di saur ni hatuaon jala songon lapik ni tangan martonggo tu Debata.

5.  Sagu-sagu : Patuduhon hasadaon sisada panghilalaan sisada sitaonon.

6.  Itak nanihopingan : Nang pe paimbar-imbar pangalaho dohot roha   dipasada dibagsan sada inganan.

7.  Itak Gur-gur : Patandahon las ni roha alai dihirim roha asa gur-gur dihajolmaon sian roha na geduk mulak marpangalaho na denggan.

8.  Gaol             : Halambohon

9.  Ansimun      : Pangalumi (malum sian parsahiton dohot angka na jat)

10.lambe          : parngoluan na imbaru namarhatuaon

11.Mange-mange ni pining : Sada ni roha mula ulaon, marotor manumpak tu nauli.

12.Sagi Natolu            : Inganan pelean ni habatahon na marsagi tolu.

13.Silinjuang     : marjuang mangalo na jat dohot na so hasea na manghorhon dosa.

14.Sangkal Sipilit : manangkal asa pilit sude uti-utian ni pangago.

15.Potong saurmatua  : Patandahon hatuaon naso mansadi.

16.Situmbur ni hope    : ondolan ningolu

17.Situmbur ni bulu    :  mangalului dalan naullehet

18.Tatuan        : hundulan namarhasongtion

19.Bonggar ni ruma    : inganan partonggoan dohot pargonci

20.Palti bulung sihala  : margogo mangalo na jat dohot na jat.

21.lilin na tolu   : patandahon hadirion ni tondi porbadia namangiring-iring parngoluon ni Huria.